供定唔供？自願供 MPF 扣稅有無着數？

5 min readMar 31, 2019

對住呢個 (自由填充) 政府，甚至能夠慷納稅人之慨拎兩個億出嚟起條二十米長的拜山通道，但人生唯死與稅無可避免，到最後咪又係點都要死死氣咁交稅，唯有無所不用其極找方法避稅，嗱，係避稅 (Tax Avoidance)，唔係逃稅 (Tax Evasion)，然後友人就問道，究竟新近的扣稅措施有無着數呢？

話說《2018年稅務及強積金計劃法例（關於年金保費及強積金自願性供款的稅務扣除）（修訂）條例草案》將於 4 月 1 日生效，簡而言之，先唔講比較複雜的年金計劃 (而自願醫保又是另一個話題了)，各位打工仔可開立「可扣稅自願性供款 (TVC) 帳戶」，而 TVC 供款可作扣稅之用，稅務扣除額上限暫訂為每年六萬大元，惟此等供款須待 65 歲 (撇除特定情況) 方能提取。

慳到幾多稅？

扣稅項目五花八門，難以一一列出，故在此只看應課稅入息實額 (Net Chargeable Income, NCI)，如以中位數月入約一萬八計算，年薪 $216,000，再扣減個人基本免稅額 $132,000 以及 MPF 供款 $10,800，假設並無其他扣稅項目，NCI 為 $73,200 (i.e. $216,000-$132,000-$10,800)。

2019/2020 課稅年度開始可以強積金自願供款自 NCI 扣減最多$60,000，若然 NCI 在最高稅率的稅階 (17%，交標準稅率的話條數仲易計，反正劃一 15%) ，當然能夠省回更多稅款 (可高達 $60,000 x 17% = $10,200)。不過近年有稅款減免，例如 2018/2019 年度寬減 75% 稅款 (上限為 $20,000)，若然人工未能用盡 $20,000 上限，又變相降低了TVC 的吸引力。

假設自願供多 $60,000 MPF (別問我點解 NCI 得幾皮都會供六皮野)，若然 2019/2020 年度的稅款寬減與 2018/2019 相同，NCI 三十二萬左右就可以食盡嗰 $10,200。下一個問題，就算真係慳到咁多稅，又係咪值得咁做呢？咁就當然要睇你還有甚麼選項了。

供定唔供好？

眾所週知，強積金表現實在慘不忍睹(自 2000 年開始的年度 IRR 僅 3.2%)，高昂的管理費舊年蠶食打工仔大概一百二十億 (2018年12月總資產達 8,130億，平均基金開支比率為 1.52% ，當你一罐丹麥午餐肉廿蚊罐，買到 6 億罐，每個香港人分到 80 罐，咁食法應該會高血壓)。其實盈富基金全年經常性開支僅約 0.09%，當然有人會話咁 MPF 要幫你追欠供呀，仲有下刪三千字咁多的行政工作，全部都要人，但上個年度全年總供款唔過五百億，你用一百億去做呢五百億供款的行政工作，多謝晒喎，如果你回報好都仲條氣順少少啫。咦，離題萬丈了，返返嚟先，咁究竟供唔供好呢？

It depends. (當年教授話唔識的話，乜都答 It depends，反正世事無絕對，又唔話得你錯，可能送返少少同情分俾你，漏空就神仙難救)

供唔供其實要考慮幾個因素，你自己的投資表現、目標 MPF 基金的投資表現、NCI 所在的稅階、你呢筆錢係咪真係閒到無其他用處、同埋你仲有幾多年退休。先假設無退稅，而且你 NCI 夠高，你的 MPF 自願供款全數落在 17% 稅階，然後那些時間點匹配 (唔好同我計唔同月份供、生日同交稅又點)。

當你有一萬蚊閒錢，你面前有兩個選擇：

自願 MPF 供款 $10,000，俾少 $1,700 稅，但鎖死筆錢到 65 歲
唔供 TVC，故此要拎返 $1,700 去交稅，然後自己拎淨低的 $8,300 去投資，可以隨時動用

跟黃子華學投資，除左冧把降，當然仲有世界第八大奇蹟之 the power of compounding，不停咁利疊利，拎晒學費去利疊利，你大學畢業時，我就退休啦 (去片)。

咁到你 65 歲時，邊個選項會比較多錢？

設 MPF 每年回報為 3.2%，你自己無得食自己夾棍，每年回報有 4.2%：

若然你年紀比較大，其實自願供 MPF (藍線)會比較划算，最極端的例子是，當你今年 64 歲，你自願供 MPF 一萬蚊，慳左千七蚊稅，出年就拎返 $10,320，但唔供就要交返嗰千七蚊稅，淨返嗰 $8,300 出年只會變做 $8,648.6，咁緊係供落去有着數啦。但反之若你比較年輕，當 20 歲啦，the power of compounding 就會好明顯的了 (當年幫初中補習就會拎呢個例子，差 1% 回報會有咩後果)，前者只有 $41,265 而後者會有 $52,860，講緊差二成有多喎。