未必個個聽過 g0vhk.io，先喺佢個 Facebook Page 抄段簡介：
g0vhk.io受台灣「零時政府」（g0v.tw）的理念啟發。目的是透過技術解決社會問題，以項目形式推動社會進步。
Hackathon 係咩嚟？
唔好見到個 Hack 字就聯想起要非法入侵人地嘅電腦系統 （話說嗰日活動完同朋友講起，佢劈頭就問我係咪 Hack 入左政府系統）。是咁的，我地奉公守法，完全唔會有意或無意或蓄意不誠實取用電腦，而小弟不學無術，淨係識引用維基條目：
在 Hackathon 當中，電腦程序員以及其他與軟體發展相關的人員，如圖形設計師、界面設計師與專案經理，相聚在一起，以緊密合作的形式去進行某項軟體專案。
睇完都一頭霧水？唔緊要，完全正常，you are not alone。
淨係 IT 狗先參加得？
非也非也，其實我會形容佢似個 Speed Dating 配對平台，一方面有人對社會議題有啲諗法，但奈何苦於無乜技術，而另一方面有人有技術(可以係編程，亦可以係平面設計、UI、UX)，卻未必有渠道去運用技術推動社會進步，而喺呢個平台就會先有人（任何人都得）舉手立項提案同埋簡單 present 佢想做乜同想搵乜人，其他人就視乎興趣、能力睇吓參加邊個項目好，當衰公（我指 Demand-Supply) 初步配合，咁就可以坐埋一枱（唔係癡癡呆呆嗰種）深入傾吓可以點合作。
嗰日流程係點？
首先唔少得介紹 (slides) 返成個活動係乜嚟，當然每個 Project Proponent (「坑主」)都出嚟講幾分鐘去招人，之後就到全場輪流自我介紹一下 (用三個 hashtags 去概括)。話說嗰日都幾多人參加，有啲好似喺新手班見過，不過自問記性太差，其實輪完一圈都已經唔太記得甲乙丙丁 ABCD 係邊個打邊個，但有緣自會喺唔同 Projects 相見。自介完隨即已經係自由時間，俾大家去搵唔同坑主交流，若然一拍即合就即刻開波傾落去，由兩三點落手做到六點半，然後坑主就會出嚟匯報進度。視乎個 Project 本身幾大同幾難，但大家又唔係三頭六臂，一般都好難喺短短幾個鐘揼起成件野，但咁唔代表個 Project 喺 Hackathon 散場後就直接胎死腹中：
Now this is not the end. It is not even the beginning of the end. But it is, perhaps, the end of the beginning.
― Winston Churchill (錄音)
依家科技咁發達，唔駛吓吓見面先做到野嘅，不過當然都要睇坑主之後點維持個 momentum，協調人力物力繼續做落去，虎頭蛇尾就唔好啦~
有啲乜 Projects？
題材幾廣泛，總會搵到啱你心水嘅，好似社區資訊、醫療體系相關數據等等，再唔係絕對歡迎大家自立門戶。
咁你嗰日做左乜？
前文都提到嗰時喺 TG Group 見到有人講起急症室等候時間，之後就根據個框架寫咗篇文，而今次就喺 Hackathon 同坑主 (黃浩華) 再傾可以點合作，因為本身已經用 R 寫咗堆 code ，唔駛再 reinventing the wheel。
嗰日目標好簡單，整個 Dashboard 網頁框架原型，顯示到各大醫院過去一段日子的平均輪候時間就收得工，最後落手做就得坑主同小弟，然後開左個得兩條友嘅 TG Group (笑)。
由於只得兩條友，分工亦好清晰，小弟負責改動本身用 R 寫嘅 code 輸出個包含分析結果同埋醫院地理資料嘅 json 檔案，坑主就同時整個 front-end dashboard 原型。其實唔難，因為小弟嗰部份只係要將本身嘅結果轉做 json 檔格式，反而問題出咗喺處理中文字嗰度，話說 R 對中文字有時未做到無痛兼容，最後俾佢折磨咗陣先搞得掂，不過都叫六點前已經完成晒計劃要做嘅工作 (當日最後成果，個 UI 原型當然好原始，當成 Proof of Concept 吧，後來坑主已經執靚咗好多)。
終極目標除左有個 Dashboard，仲會整個 API 方便其他人拎數，所以坑主後來開左個 Collaction 頁面，大家可以喺 Collaction 得知項目進度，而程式碼亦已放上 Github (後來小弟嗰部份已改用 Python 重寫)，絕對歡迎各位幫吓手；
Dashboard: https://github.com/g0vhk-io/ae-waiting-time-dashboard
API: https://github.com/g0vhk-io/ae-waiting-time-dashboard-api
(其實仲要搵其他人搞個 API，暫時用 Python 寫背後輸出 json 嗰部分做得七七八八)
