話說上星期喺 YouTube 見到條片，講用 CSL (唔係電話公司，更唔好睇錯字母次序，係 Cities: Skylines) 起返個香港出嚟，用迷你香港地圖，同埋一大堆具香港特色的物件，望落真係幾有心機，好野就緊係要 Share 吓。
要講 ge 其實已經講完，之後純吹水 XD
唔知大家平時打開咩機 (定係其實冇再打)，小弟由小學到依家基本上都係玩模擬遊戲多，當中最經典的莫過於模擬城市 (SimCity) 系列，2003年推出的 SimCity 4 就絕對係經典中的經典，不過第一隻玩的模擬城市類遊戲應該係叫做 Mobility，隻遊戲到依家仲可以喺網上搵到，好神奇，不過顧名思義，個遊戲側重喺交通方面，唔駛理風火水電，但又極易破產，畢竟全世界運輸賺錢係少數，好似因鐵咁賺錢就更加少之又少，解救方法就係，學香港咁狂加燃油稅，然後再起堆高樓大廈，靠貴租有限停車位支撐成個公共運輸系統 (聽落真係好唔現實)。(同埋邊個打機學唔到野，嗰時為左玩佢要係咁查字典)
之後就到 SimCity 4，2003 年 SARS 期間全港停課，不過究竟嗰陣有無玩緊其實已經唔太記得，淨係記得嗰陣校方為免大家荒廢學業，要大家每日一篇 (年輕一代有冇聽過？)。第一次玩 SimCity 4 時完全係入左個新天地 (但嗰時電腦個 config 好廢，玩得好勉強，人口太多就頂唔順)，加埋後來出埋 Rush Hour 擴充包就多左好多運輸規劃元素，而 SimCity4 更有災難模式，滿足各位邪惡不平衡的變態心理，俾大家將自己一手一腳起出嚟的城市用不同天災去摧毀佢，可以係火燒所多瑪，或者整個火山，再加埋地震、龍捲風、隕石去將成個城市夷為平地。
其後 SimCity 5 一直只聞樓梯響，估唔到由 Maxis 開發的後續版本已經要等到 2013 年，期間雖然有其他公司出過呢個類別的遊戲，但終歸無隻可以超越 SimCity 4，畢竟 SimCity 4 實在太成功。雖則十年磨一劍，2013 年的 SimCity 卻令人大失所望，初期更強逼玩家一定要在線玩，但伺服器又負荷唔嚟，結果個個怨聲載道，就算後來容許離線咁玩，好多人都離棄左佢，而取而代之的是 2015 年推出的 Cities: Skylines。
Cities: Skylines 極受好評，而且容許玩家自由創作，喺 Steam Workshop 會搵到大量專業的修改模組為遊戲加添功能，（文首段片就用左大量呢類Mod/ Asset)，大至不同的地圖，細至可以調整某條行車線的設定 (轉左轉右等等)，甚至可以匯出成一張紙地圖，應有盡有，實在百玩不厭。而 CSL 本身其實好平，核心組件在特價時只係幾十蚊港紙，而有些 DLC 都真係值得俾錢買支持吓廠商，唔似 Sims 系列有你無你乜都 DLC 掠水。
無論現實定遊戲裏面，除左維持收支平衡，交通始終係個大問題，細個玩運輸，大個咪返工俾運輸玩，而點樣可以喺城市規模越嚟越大之時維持運輸系統運作正常係門大學問，喺 YouTube 會搵到讀 Transport Planning 的人運用佢地學識去玩呢個遊戲，甚或幫人解答疑難 (廠商甚至搵埋佢地拎意見，打機打到咁認真，真係寫個服字，據講有人真係有興趣到去刨 Transport Planning 的參考書，學海無涯，善哉善哉)。
其實寫篇文係想推大家入坑試吓玩 CSL 而已，特價時就會慫恿朋友去玩(特別喺那些剛換了新電腦的朋友，嗱，我無佣收)。至於除左模擬類，其他類型遊戲，手腦眼唔協調的小弟就真係投晒降，例如玩 Winning 會射自己龍門呀(早幾日聽朋友講原來依家唔興 Winning 了)，玩 AOC 會圈養綿羊做寵物 (然後友人分數長期係我幾倍之上咁)，人貴自知，都係無謂獻世好了，玩返 CSL 咪算囉。
